Mat 12 | GbrGAW | STEP | Nwyihoi, n satiwyi yi, nyipyei na Yahudawayi zhin ɓa la Shekwoyi tu, Yesu wa sadu na wyizhin n wa bara yi. Mikun ɓei ku ɓa gun, ɓa ya awyi shin bma ɓai wu kpe na bwada ɓai gyi.

Matthew 12

Dagayi Satiwyi Nya

1 Nwyihoi, n satiwyi yi, nyipyei na Yahudawayi zhin ɓa la Shekwoyi tu, Yesu wa sadu na wyizhin n wa bara yi. Mikun ɓei ku ɓa gun, ɓa ya awyi shin bma ɓai wu kpe na bwada ɓai gyi.

2 Ama shi a Farisiyi ɓei gye lo nu, ɓa gna, “Oha bara la owa zungna. Ɓai do-wyi n Satiwyi yi.”

3 Ama Yesu wa gna ɓa, “Fye to shin ba fya wo ɓo nʼsu Dauda ɓo zhin n wa nugundo yi n mikun ɓei ku ɓa gun? 4 Wo ɓo lo dna na duwa zhin ba, ɓa gyi bredi nkwo ɓo shi ge a pirist nu ɓa bwa kwo gyi nyi. Ko ɓo zhin owa gnana zun nu ce. 5 Fye to shin ba njesun, dna n Musa wa ngye shi a pirist n ɓa fi na duwa zhin ba nyi, ɓa zhin tnu-tnu n Satiwyi yi n? 6 Ma gna fye gaiciya, Eza gni lo ya n wo du aduwa zhin ba lo n mwa-mwa. 7 Fye ɓo gna fye ku aya ye awyega bwa n kwo gna, ‘Mi ye fya ze a sun-sun gye yi, n du fye nyaga,’ to fyei zun tna laifida kni m. 8 E mi, ‘Zanugun, mi nu zhin Satiwyi Dagayi.’ ”

9 Wa pmi wa lo ɓa duwa nyakun, 10 Wa gye obwa sha-shai da. A Farisiyi ɓa nya Yesu ge kwo bmiya lo a ka nyasan yi gna n Satiwyi yi? (Ɓai gye ngye wo ɓa ye ge, “E,” n nabai ɓa wan wo.) 11 Amsa nyi n wo ɓo ga, “Ndai ho n ena buyi bwasun lo gmanyi, kwa kaya dna rijiya n Satiwyi, ho ɓa gmi kwo n wyihi yi? Lallei ho ɓa gmi. 12 Shi eza du ena-buyi lo nyi, kwo bmiya lo a zhin ɓe manayi n Satiwyi yi?” 13 Wa pmi wa gna zahi ge, “Ta ho bwa ya.” Shi wo ɓo taya, wa lafiya bwa kwa wo ʼwu ngye bayi.

14 Nsayi a Farisiyi ɓa lo ɓa zhin shawara ɓa wan Yesu ɓa wu wo. 15 Ama Yesu wa ku ɓa shawara kpe, wa gmi na duwa nyakun azai vi wo mwa. Anyasan yi vinya n ɓa mi wa ɓa kagna. 16 Ama wa gni ɓa tnubua ge, ɓa to gna Wo ɓeda mi aza kagna nya m. 17 Deye ko ku ɓo nu anabi Ishaya ɓei da nu, tu n Yesu tukwo:

18 “Shi Mi Bara awye! Gye Mi Za kni-kniyi! Owo nu n mi ye, n mi wye-wyei dagma woi. Miɓa puwo mi Zafun, Wo ɓa da abye ʼwa. 19 Wo ta sun okun kwo wa ɓewyi m, wo ta la begye tu m. 20 Wo ta ye kalagbai fyan, kwo wa ci awyetu wyegba m. Owo nasara ɓa zo aɓo viyan. 21 Owo ye ɓa ze anyi vinya awyetu.”

22 Zafun nukwoi da ho, wye-buai nu, takpe ɓeda njesun, aɓe n woi n Yesu aba, Yesu wa ka wo gna, wa mi wa da ɓo, woi gye wyeba n jesun. 23 Cawo azayezhi ɓai gna, “Ko Yesu zhin Masihu na?”

24 Ama shi a Farisiyi ɓo wo ce, ɓa gna, “Wo mi woi kun a zafun nukwoyi ya, ntu ge wo zhin Shetan nu a zafun nukwoyi su.”

25 Yesu wa ku a nubo zhin kpe wa gna ɓa ge, “Ebe n kwo zhin gaba n kohin yi, kwo ɓa miya. Ezhi n kwo zhin gaba n kohin ko ta mi kwa gni-agni m. 26 Ndei Shetan nya shetan ya, wo sunkun n wohin un, woi mi wo ʼbe ya. 27 Ndei fye gna ge, mi kun a zafun nukwoyi ya n shetan iko yi nu, efya za nɓa ku azafun nukwoyi ya nyi ma, ɓa kun ɓa ya n kni ikoyi na? Fye ga fyehin amsa. 28 Ama n gye mi kun azafun nukwoyi ya n Shekwoyi zafun yi nu, a gye Shekwoyi ebe la ɓe fya ba. 29 Eza tami wa wyi shetan iko m, sai wo la shetan pa kpa, n sayi wa mi wa kun a zafun nukwoyi ya. 30 Eza n wo ta bma mi zhin m, wo zhin mi wahala ga yi nu.

31 – 32 “Eza n wa da mi ɓenukoyi, n laifi doho-dohoi yi, aɓa zhin za gafara, amma eza n wa da Zafun gyi-gyi-yi ɓenukwoyi, a ta zhin wo gafara m, ko nanyi ye, ko nanyi n ɓa ɓe lo nyi.

33 “A kpe shinwan doho-dohoi ye n ko gyi-gyi yi nu. Shinwa manayi kwa gyi n bmiya, shinwa nukwoyi kwa ga gyi-gyi nukwoyi. 34 Efye awa ɓi! Ko ɓa ye zhin nwuna aza nukwoyi ngye fye fya da ɓeda manayia? Ntu ge eza bugba nu wu za ɓo nwo ɓa da. 35 Eza manayi zhin wa da ɓo manayi n ko fi n wo mi. Bugba nukwoyi da kuwa wa da ɓeda nukwoyi n kwo fi womi. 36 Ma gna fye, n wada wyi yi, ɓei ɓe n fye nyadoku yi tu ɓeda gbeloyi doho-dohoi ɓo n fye ku da. 37 Efya ɓeda n sayi ye nu ɓei zhin fya kni nʼwa, ko ɓei zhin a zun fye kni.”

Ga Yi Tuze Ho

38 N wyihoyi a Yahudawayi a tukwoda ɓedo a Farisiyi yi, ɓa ɓe Yesu aba ge ɓa ye wa wu ɓa tuze (kwa wu ge wonu ku Masihu zhin).

39 – 40 Yesu wa gna ɓa ge, “Sai abye nukwoi ɓedo na tna gaiciya-gai yi, ɓa nu ɓa nya a tuze ɓo. Anyi ta shan ɓa doho wu ndu tuze anabi Yanana nya m! Ntu ge shi Yunana ɓo dna nʼbmiya yakwo mi anypyei gun ata, asukwoyi gun ata, nʼlo nu Emi Masihu ɓa dna nʼkni nubo anyipyeyi gun ata, asukwo gun ata. 41 N wada wyi yi, a Ninevayi ɓei zun fye kni. Ntu ge esa n Yunana ɓo zhin ɓa waʼazi ɓa ɓo ku ye abui Shekwoyi aba, ɓa ku aɓo nukwoi zokwo ya. Eza n wo du Yunana, wo gni lo ya fyei ta ye lo fya ga wo gaiciya m. 42 Sarauniya Sheba nya ɓo laka da abye ye wo zun ɓa kni n wada wyi yi, ntu ge wo ɓo gmi n kni do n kpai, wa wo Solomon ɓeyekpe, eza n wo du Solomon, wo gni lo ya fyei ta ye lo fya ga wo gaiciya m.

43 – 44 – 45 ^{▼▼The text of verses 43-Mat 12:45 has been merged.} “Aɓye ye wu lo ngye eza n wo zafun nukwoyi yi. Esa nu zafun nukwoyi gmi n wo kwalo zhabui koi ye asun-sun ba to kwa bwa m. Kwa gna ko ɓa jeze kwa lo kwa gusa, esa kwo ɓe kwa gye zahi bugba zhan baya shi, ama ntna nya dna yi! Sai kwa lo kwa yi a zafun nukwoyi ngun tnaba ɓa ɓe lofi n zahi mi. Ezahi esese kmaknayi ɓei la du kmisunyi n nukwoyi.”

46 – 47 Esa nu Yesu ɓo dna woi daɓo naza yezhi yi n nyakun, owo ʼya ɓedo nwa zaje yi ɓa ɓe zhi n bmi ɓai ye ɓa daɓo n woi. Zaho wa gna wo ge ɓa ye wo lo. 48 Wa gna ge, “Nyikanu zhin mi ʼya? Anyika nu zhin maza-jeʼa?” 49 Wa wu wa bara bwa wa gna, “Gye! Aza deye ɓa nu zhin ma ʼya n mazaje yi. 50 Wa je ko ɓe ge, Eza n wo vi mi Dada ɓeye n wo dna she nyi, wo nu zhin mi zado, emi mapui n mi ʼya yi.”